Yuxu problemləri müxtəlif səbəblərlə bağlı ola bilər. Stress, emosional gərginlik, gündəlik rejimin pozulması və uzun müddət ekran qarşısında qalmaq yuxunun keyfiyyətinə təsir göstərə bilər. Yuxuya getməkdə çətinlik, gecə ərzində tez-tez oyanmaq və səhərlər kifayət qədər dincəlmiş hiss etməmək davamlı xarakter alırsa, bu vəziyyətə diqqət yetirmək lazımdır. Yuxu problemləri uzun müddət davam etdikdə insanın diqqətinə, gündəlik fəaliyyətinə və həyat keyfiyyətinə təsir göstərə bilər.

 

Bu barədə Aztibb.az-a məlumat verən Xəzər Tibb Mərkəzinin Nevrologiya şöbəsinin müdiri, həkim-nevroloq Elnarə Salahova bildirib ki, yuxu probleminin səbəbini müəyyən etmək üçün insanın yuxu rejimi, gündəlik vərdişləri və ümumi vəziyyəti qiymətləndirilməlidir. Özbaşına yuxu dərmanları qəbul etmək əvəzinə, problem davamlı xarakter aldıqda həkimə müraciət etmək tövsiyə olunur.

 

Onun sözlərinə görə, yuxu rejiminə riayət etmək, yatmazdan əvvəl ekran qarşısında keçirilən vaxtı azaltmaq və gün ərzində fiziki aktivliyə diqqət yetirmək yuxunun keyfiyyətinin yaxşılaşdırılmasına kömək edə bilər.