ÜST-nin Azərbaycan Ofisindən Aztibb.az-a bildirilib ki, sminar ÜST-nin Avropa üzrə Regional Ofisinin Avropa İttifaqı tərəfindən maliyyələşdirilən “Şərq Tərəfdaşlığı ölkələrində səhiyyə sistemlərinin dayanıqlılığının dəstəklənməsi” təşəbbüsü çərçivəsində təşkil olunub.

 

Seminarda Azərbaycanın müxtəlif bölgələrindən 50-dən çox iştirakçı bir araya gəlib. İştirakçılar arasında Səhiyyə Nazirliyi, Əmək və Əhalinin Sosial Müdafiəsi Nazirliyi və TƏBİB-in nümayəndələri, psixi sağlamlıq sahəsində çalışan mütəxəssislər, psixoloqlar, psixiatrlar, sosial xidmət mütəxəssisləri, vətəndaş cəmiyyəti nümayəndələri və psixi sağlamlıqla baqlı stiqma üzrə yaşanmış təcrübəsi olan şəxslər iştirak edib.

 

Seminar çərçivəsində Azərbaycanda psixi sağlamlıqla bağlı stiqmanın müxtəlif təzahürləri müzakirə edilib, ÜST-nin MOSAIC aləti, onun əsas prinsipləri və tətbiq imkanları təqdim olunub.

Tədbir çərçivəsində, həmçinin stiqmanın azaldılmasında sosial təmas yanaşması və praktiki strategiyalar nəzərdən keçirilib, antistiqma müdaxilələrinin effektivliyinə təsir edən əsas amillər müzakirə olunub, yaşanmış təcrübəsi olan şəxslərin gələcək fəaliyyətlərin hazırlanması və həyata keçirilməsində mənalı iştirakının əhəmiyyəti vurğulanıb. Bundan başqa, Azərbaycanda növbəti mərhələdə həyata keçirilə biləcək prioritet istiqamətlər və praktiki müdaxilələr müəyyənləşdirilib.

 

Seminar yerli konteksti anlamaq və prioritetləri müəyyənləşdirməkdən birgə dizayn mərhələsinə keçid üçün mühüm başlanğıc oldu. Növbəti mərhələdə məqsəd Azərbaycanda pilot üçün praktik müdaxilənin birgə hazırlanmasıdır.

 

Yaşanmış təcrübəsi olan şəxslərin, müxtəlif sektorların və peşəkarların bir araya gətirilməsi Azərbaycanda daha inklüziv, insanmərkəzli və kontekstə uyğun psixi sağlamlıq yanaşmalarının formalaşdırılması üçün mühüm addımdır.