ATU-nun I Cərrahi xəstəliklər kafedrasının müdiri, professor Nuru Bayramov Aztibb.az-a bildirib ki, pasiyent təxminən üç ay əvvəl laparoskopik xolesistektomiya əməliyyatı zamanı öd yollarının zədələnməsi səbəbilə klinikaya müraciət edib. İlkin mərhələdə öd yollarının drenajı həyata keçirilib və pasiyentin vəziyyəti dinamik müşahidə olunub.

 

“İltihabi proseslərin səngiməsini və qaraciyər toxumasının bərpasını gözlədik. Sonrakı müayinələrin nəticələrinə əsasən pasiyent rekonstruktiv əməliyyat üçün hazır vəziyyətə gətirildi. Daha sonra öd yollarının rekonstruktiv əməliyyatını icra etdik.

 

Əməliyyat zamanı öd yolları boylama istiqamətdə açıldı və təxminən 4–5 santimetr ölçüdə anastomoz formalaşdırıldı. Ekstrahepatik öd yolları ilə Roux-en-Y üsulu ilə hazırlanmış nazik bağırsaq ilgəyi arasında hepaticojejunoanastomoz qoyuldu”, deyə professor Nuru Bayramov qeyd edib.

 

Hazırda pasiyentin ümumi vəziyyətinin yaxşı olduğu, əməliyyatdan sonrakı dövrdə müalicə və müşahidəsinin davam etdirildiyi bildirilib.