Naxçıvan Muxtar Respublikası Səhiyyə Nazirliyi və “Tibb Müəssisələrinin Akkreditasiyası və Keyfiyyətə Nəzarət Mərkəzi” PHŞ-nin birgə təşkilatçılığı ilə Naxçıvanda orta tibb işçiləri üçün ilk dəfə keçirilən sertifikasiya imtahanının nəticələri açıqlanıb.

Nazirlikdən Aztibb.az-a bildirilib ki, sertifikasiya imtahanının nəticələrinə əsasən, 215 nəfər imtahanı müvəffəqiyyətlə keçərək sertifikasiyadan uğur qazanıb. Yekun nəticələrə əsasən, 48 nəfər müəyyən edilmiş tələblərə uyğun nəticə göstərməyib.

Beləliklə, iştirak edənlərin 81,7 faizi sertifikasiya imtahanından uğurla keçib.

Qeyd edək ki, sertifikasiya imtahanının nəticələri ilə hər bir iştirakçı Səhiyyə Nazirliyi Sertifikasiya Komissiyasının rəsmi internet səhifəsi olan snsk.az portalında şəxsi eyniləşdirmə kodu vasitəsilə tanış ola bilər.

Sertifikasiya imtahanının keçirilməsi orta tibb işçilərinin peşə bilik və bacarıqlarının obyektiv qiymətləndirilməsi, peşə hazırlığının müasir tələblərə uyğunluğunun müəyyənləşdirilməsi və əhaliyə göstərilən tibbi xidmətlərin keyfiyyətinin daha da yüksəldilməsi baxımından mühüm əhəmiyyət daşıyır.