Hazırda Azərbaycanda narkotik asılılığından əziyyət çəkən 675 nəfər metadonla əvəzedici müalicə proqramına cəlb olunub.

Aztibb.az xəbər verir ki, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupundan bildirilib ki, müalicə üç məntəqədə həyata keçirilir. Respublika Narkoloji Mərkəzində 262, QİÇS-lə Mübarizə Mərkəzində 290, Sumqayıt Narkoloji Mərkəzində isə 123 nəfər müalicə alır.

Məlumata görə, bu ilin yanvar-avqust aylarında bütün növ sərxoşluq hallarının müəyyənləşdirilməsi məqsədilə Daxili İşlər Nazirliyi tərəfindən 62 227 nəfər Səhiyyə Nazirliyinin Respublika Narkoloji Mərkəzinə yönləndirilib.

Həmin şəxslərdən 4 397 nəfər narkotik vasitələrdən istifadənin müəyyənləşdirilməsi məqsədilə tibbi müayinədən keçirilib. Müayinələrin nəticələrinə əsasən, 2 173 nəfərin narkotik vasitələrdən istifadə etdiyi müəyyən olunub.

Bununla bağlı qanunvericiliyə uyğun zəruri tədbirlərin görülməsi təmin edilib.