Mərkəzi Klinikanın peşəkar uşaq cərrahı və uroloqu Günel Əmiraslanova tərəfindən cəmi 1 aylıq körpə üzərində həyati əhəmiyyət kəsb edən mürəkkəb cərrahi əməliyyat uğurla həyata keçirilib.

Aztibb.az xəbər verir ki, böyrəyini itirmək riski ilə üz-üzə qalan, çəkisi cəmi 4 kiloqram olan qız uşağında aparılan müayinələr zamanı şiddətli böyrək genişlənməsi aşkar edilib. Vəziyyətin kritikliyini nəzərə alan cərrah və komandası körpəni təxirəsalınmaz şəkildə əməliyyata alıb.

Müdaxilə zamanı orqanın fəaliyyətini təhlükə altına qoyan və kəskin genişlənməyə səbəb olan üreteropelvik dar seqment xaric edilib və sidiyin təbii axarı bərpa olunub (pyeloplastika əməliyyatı).

Əməliyyat uğurla nəticələnib. Vaxtında və peşəkar müdaxilə sayəsində böyrəyi tam xilas edilən azyaşlı pasiyent risklərdən uzaq, tam sağlam şəkildə ailəsi ilə birlikdə yaşadığı rayona yola salınıb.