Azərbaycan Tibb Universitetinin (ATU) epileptologiya sahəsində apardığı elmi tədqiqatların nəticələri Afinada keçirilən 16-cı Avropa Epilepsiya Konqresində (16th European Epilepsy Congress) beynəlxalq elmi ictimaiyyətə təqdim olunub. 

Bu məlumat Aztibb.az-a ATU-dan verilib.

Epileptologiya üzrə dünyanın aparıcı elmi platformalarından biri olan konqresdə Azərbaycan Tibb Universitetini Nevrologiya kafedrasının dosenti, Epilepsiya Əleyhinə Beynəlxalq Liqanın (International League Against Epilepsy – ILAE) Azərbaycan bölməsinin katibi Şəhla Məlikova təmsil edib. 

Epilepsiya Əleyhinə Beynəlxalq Liqa  tərəfindən təşkil olunan konqres 100-dən çox ölkədən 4000-dən artıq həkim və aparıcı mütəxəssisi bir araya gətirib. Elmi proqram çərçivəsində müxtəlif ölkələrdən 300-dən çox alim epilepsiyanın diaqnostikası, müalicəsi və tədqiqinin aktual istiqamətləri üzrə məruzələrlə çıxış edib. 

Beynəlxalq tədbirdə ATU əməkdaşlarının - Nevrologiya kafedrasının müdiri, professor Aytən Məmmədbəyli və Şəhla Məlikovanın epilepsiyalı hamilə qadınlarla bağlı apardıqları elmi tədqiqatın nəticələri təqdim edilib. Araşdırmanın nəticələri mütəxəssislər tərəfindən maraqla qarşılanıb və elmi sessiyalar çərçivəsində geniş müzakirə olunub. 

Konqresdə, həmçinin Azərbaycanda epilepsiyanın öyrənilməsinə həsr olunmuş genişmiqyaslı tədqiqat barədə məlumat verilib. Araşdırmanın nəticələri konqres çərçivəsində keçirilən ILAE Bölmə Konvensiyasında, eləcə də tədbirin bütün günləri ərzində nümayiş etdirilərək beynəlxalq mütəxəssislərin diqqətinə çatdırılıb. 

ATU-nun bu mötəbər elmi tədbirdə iştirakı Azərbaycanın epileptologiya sahəsində həyata keçirilən tədqiqatların beynəlxalq səviyyədə tanıdılması baxımından mühüm addım olmaqla yanaşı, universitet alimlərinin əldə etdiyi elmi nəticələrin dünya mütəxəssisləri ilə bölüşdürülməsinə və ölkəmizin epileptologiya sahəsində elmi potensialının nümayişinə imkan yaradıb.