Çinin Fudan Universitetinin alimləri yavaş burun nəfəsinin insanı niyə sakitləşdirdiyini və narahatlığı necə azaltdığını elmi olaraq sübut ediblər.

Aztibb.az-ın “MedicalXpress”-ə istinadən məlumatına görə, qədim zamanlardan bəri yoqa və meditasiya kimi üsullarda mənfi əhval-ruhiyyəni aradan qaldırmaq üçün yavaş nəfəs alsalar da, bunun beyində necə işlədiyi dəqiq bilinmirdi. Yeni araşdırma bu sirli mexanizmi üzə çıxarıb. Nəfəsin sürəti isə hər şeyi dəyişir: yavaş nəfəs beyni sakitləşdirən siqnal göndərir, narahatlığı azaldır və beyin dalğalarını gücləndirir, sürətli nəfəs isə əksinə, narahatlığı artırır.

Tədqiqat zamanı iki həftə ərzində gündə iki saat yavaş burun nəfəsinə məruz qalan siçanlarda narahatlıq davranışlarının azaldığı və bu sakitləşdirici təsirin müalicə bitdikdən sonra da ən azı bir həftə davam etdiyi görülüb. Dünyada milyonlarla insanın əziyyət çəkdiyi narahatlıq pozğunluqları ilə mübarizədə bu kəşf gələcəkdə heç bir dərman və ya əməliyyat tələb etməyən sadə nəfəs üsulları ilə sağlamlığımızı tənzimləməyə kömək edə bilər.