Beyin, sinir və onurğa beyni cərrahiyyəsi üzrə mütəxəssis, professor Orhan Şen gənclər arasında bel və boyun yırtığı hallarının artmasında uşaqlıqdan formalaşan hərəkətsiz həyat tərzinin mühüm rol oynadığını bildirib.

Aztibbb.az "Haber Türk"ə istinadən yazır ki, onun sözlərinə görə, telefon, planşet və kompüter qarşısında uzun müddət vaxt keçirilməsi uşaqların və yeniyetmələrin eyni vəziyyətdə qalmasına, boyun, bel və ayaq əzələlərinin kifayət qədər inkişaf etməməsinə səbəb olur. Keçmişdə hərəkətli oyunların mühüm yer tutduğu uşaqlıq dövrünü bu gün uzunmüddətli ekran istifadəsi əvəz edir.

Professor qeyd edib ki, zəif əzələ sistemi sonrakı illərdə orqanizmin fiziki yüklərə uyğunlaşmasını çətinləşdirir. Ağır çanta qaldırmaq və ya uzun müddət idmandan uzaq qaldıqdan sonra qəfil intensiv fiziki fəaliyyətə başlamaq kimi hallar zəif əzələ və oynaqlara əlavə yük yaradaraq bel və boyun yırtıqlarının yaranmasına şərait yarada bilər.

Mütəxəssis problemin qarşısını almaq üçün uşaqların erkən yaşlardan fiziki aktivliyə cəlb edilməsinin vacibliyini vurğulayıb. Onun sözlərinə görə, valideynlər və müəllimlər uşaqları üzgüçülük, qaçış və digər idman növlərinə həvəsləndirməlidirlər.

Bildirib ki, müntəzəm fiziki aktivlik yalnız dayaq-hərəkət sisteminin möhkəmlənməsinə deyil, beynin qan təchizatına və zehni inkişafın dəstəklənməsinə də müsbət təsir göstərə bilər. Bu səbəbdən idmanın uşaqların həyat tərzinə erkən yaşlardan daxil edilməsi vacibdir.