Pirallahı Tibb Mərkəzində “Yıxılma riskinin qiymətləndirilməsi və ehtiyat tədbirlərinin görülməsi” mövzusunda təlim keçirilib.

Mərkəzdən Aztibb.az-a verilən məlumata görə, tədbir Keyfiyyətə nəzarətin idarə olunması üzrə mütəxəssis İlhamə Heybətova tərəfindən keçirilib.

Təlimdə Pirallahı Tibb Mərkəzinin direktoru Şöhrət Söyziyev, direktorun müavini – baş həkim Fəranə Gözəlova, struktur şöbə və bölmə müdirləri, baş və böyük tibb bacıları, təsərrüfat işçiləri və aidiyyəti əməkdaşlar iştirak ediblər.

Təlim zamanı yıxılma riskinə təsir göstərən əsas faktorlar, riskin qiymətləndirilməsi şkalaları, ehtiyat tədbirlərinin görülməsi, yıxılma hadisəsi zamanı ilkin yardımın göstərilməsi, hadisənin qeydiyyata alınması və əməkdaşların təlimatlandırılması barədə ətraflı məlumat verilib.

İlhamə Heybətova çıxışında qeyd edib ki, pasiyentlərin təhlükəsizliyinin təmin olunması tibb müəssisələrində göstərilən tibbi xidmətin keyfiyyətinin əsas istiqamətlərindən biridir. Yıxılma risklərinin vaxtında müəyyənləşdirilməsi və müvafiq qabaqlayıcı tədbirlərin görülməsi pasiyentlərin təhlükəsizliyinin təmin edilməsində mühüm əhəmiyyət daşıyır. Bu baxımdan, hər bir əməkdaşın yıxılma risklərinin qiymətləndirilməsi və qarşısının alınması ilə bağlı müəyyən edilmiş tələblərə riayət etməsi vacibdir.

Sonda Pirallahı Tibb Mərkəzinin direktoru Şöhrət Söyziyev standartın tətbiqi və tələblərin iş prosesində düzgün icrasının vacibliyindən danışıb. Struktur şöbə və bölmə müdirlərinə müvafiq tapşırıqlar verilib.

Təlim zamanı iştirakçıları maraqlandıran suallar cavablandırılıb.