Spinal anesteziya — əməliyyat zamanı bədənin beldən aşağı hissəsini müvəqqəti keyləşdirən anesteziya növüdür. Bel nahiyəsində çox incə iynə ilə onurğa beyni mayesinin olduğu sahəyə anestezik dərman yeridilir. Dərman sinirlərdən gələn ağrı siqnallarını müvəqqəti bloklayır.

Bu barədə Aztibb.az-a məlumat verən Xətai Tibb Mərkəzinin həkim-anestezioloqu Səidə Cəbrayılova bildirib ki, spinal anesteziya zamanı bir neçə dəqiqə ərzində ayaqlarda istilik, keyimə və ağırlıq yaranır. Sonra ayaqları hərəkət etdirmək mümkün olmur. Ağrı hiss edilmir, amma insan adətən ayıq olur.

Onun sözlərinə görə, spinal anesteziya aşağıdakı əməliyyatlarda istifadə olunur:
Qeysəriyyə əməliyyatı
Ayaq və diz əməliyyatları
Qasıq və aşağı qarın nahiyəsi əməliyyatları
Bəzi uroloji və ginekoloji əməliyyatlar.

Spinal anesteziyanın üstünlüyündən bəhs edən həkim vurğulayıb ki, ümumi narkozdan fərqli olaraq xəstə adətən özü nəfəs alır və ayıq qala bilər; ürəkbulanma və yuxululuq da bəzi hallarda daha az olur.

"Dərmandan asılı olaraq adətən bir neçə saat ərzində ayaqlardakı hiss və hərəkət tədricən bərpa olunur.
Bəzən spinal anesteziyadan sonra baş ağrısı, təzyiqin düşməsi, ürəkbulanma və bel nahiyəsində narahatlıq yarana bilər, lakin ciddi fəsadlar nadirdir", - deyə Səidə Cəbrayılova əlavə edib.