Ətraf mühitin çirklənməsinin uşaqlıq dövrü xərçənglərinə təsirinə diqqət çəkən Uşaq Hematologiyası və Onkologiyası üzrə mütəxəssis, professor İbrahim Bayram bildirib ki, böyümə dövründə uşaqlar kimyəvi maddələrə qarşı daha həssas olurlar.
Aztibb.az "Haber Türk"ə istinadən yazır ki, onun sözlərinə görə, xüsusilə hamiləlik dövründə kimyəvi maddələrə məruz qalma uşağın gələcək sağlamlığına təsir göstərə bilər.
Professor qeyd edib ki, uşaqların orqanizmi inkişaf mərhələsində olduğundan ətraf mühit amillərinə daha həssas reaksiya verir. İnfeksiyalar, kimyəvi maddələr və radiasiya kimi xarici təsirlər inkişaf prosesini poza və sonrakı illərdə xərçəng riskini artıra bilər.
Bayramın sözlərinə görə, qidalarda çox az miqdarda olsa belə kimyəvi maddələrin qalması hüceyrələrə mənfi təsir göstərə bilər. Araşdırmalarda leykozlu uşaqların sümük iliyində pestisid qalıqlarının aşkarlanması da bu məsələyə diqqətin artırılmasının vacibliyini göstərir.
Mütəxəssis hamiləlik zamanı kimyəvi maddələrə, radiasiyaya və digər zərərli amillərə məruz qalmanın dölün inkişafına təsir edə biləcəyini vurğulayıb. O, uşaqların sağlamlığı üçün ətraf mühitin qorunmasının vacibliyini qeyd edib.
Professor bildirib ki, uşaqlıq dövrü xərçəngləri arasında ən çox rast gəlinən xəstəliklərdən biri kəskin leykozlardır. Xəstəliyin yaranmasında genetik meyilliliklə yanaşı, ətraf mühit amillərinin də rol oynaya biləcəyi düşünülür.
