ATU-nun Neyrocərrahiyyə kafedrasının assistenti, Tədris Cərrahiyyə Klinikasının neyrocərrahı Namiq Əhmədov bel və sağ ayaqda kəskin ağrı, keyimə və uyuşma, həmçinin ayaq pəncəsində zəiflik şikayətləri ilə müraciət edən pasiyentə cərrahi müdaxilə həyata keçirib.

Namiq Əhmədovun Aztibb.az-a bildirdiyinə görə, pasiyentdə uzun müddət aparılan konservativ müalicə effekt verməyib. Aparılan müayinələr nəticəsində L5-S1 fəqərəarası diskin sağtərəfli yırtığı aşkarlanıb. Nevroloji müayinə zamanı sağ ayaq pəncəsində zəiflik və refleks dəyişiklikləri müəyyən edildiyindən pasiyent üçün cərrahi müalicə qərarı qəbul olunub. Pasiyentə spinal anesteziya altında mikrodisektomiya əməliyyatı icra edilib.

Namiq Əhmədov bildirib ki, fəqərəarası disk yırtıqları ağır fiziki işlə birbaşa əlaqəli xəstəlik hesab olunmasa da, fiziki yüklənmə mövcud problemin simptomlarının üzə çıxmasına və ya şiddətlənməsinə səbəb ola bilər. Bu səbəbdən xüsusilə ağır fiziki işlə məşğul olan şəxslərdə belə şikayətlərə daha çox rast gəlinə bilər.

Neyrocərrah qeyd edib ki, müasir anesteziya və cərrahi texnologiyaların inkişafı mikrodisektomiya əməliyyatının təhlükəsizliyini əhəmiyyətli dərəcədə artırıb. Bununla yanaşı, müalicənin effektivliyi baxımından düzgün zamanda müraciət və cərrahi müdaxilənin gecikdirilməməsi mühüm əhəmiyyət daşıyır. Gecikmiş hallarda sinir kökünün uzun müddət sıxılması səbəbindən əməliyyatdan sonra nevroloji funksiyaların bərpası daha uzun çəkə və nəticə daha az effektiv ola bilər.