Türkiyənin səhiyyə naziri Kemal Memişoğlu səhiyyə sahəsində rəqəmsal və preventiv nəzarət sistemlərinin gücləndirildiyini açıqlayıb.

Aztibb.az "Medimagazin"ə istinadən yazır ki, nazirin sözlərinə görə, Risk Əsaslı Nəzarət Sistemi (REDES) hazırda Türkiyənin bütün 81 vilayətində 356 nümayəndənin iştirakı ilə tətbiq olunur. Sistem vasitəsilə süni intellekt texnologiyalarından istifadə edilməklə risklərin erkən müəyyənləşdirilməsi və problemlər meydana çıxmazdan əvvəl müdaxilə edilməsi mümkün olur.

Memişoğlu bu barədə sosial media hesabında səhiyyə sahəsində həyata keçirilən rəqəmsal və preventiv nəzarət tədbirləri ilə bağlı paylaşımında məlumat verib.

Nazir bildirib ki, rutin yoxlamalarla yanaşı, məlumat və texnologiya əsaslı yeni nəsil nəzarət metodları da hazırlanır. Onun sözlərinə görə, Risk Əsaslı Nəzarət Sistemi son dövrdə əhəmiyyətli dərəcədə təkmilləşdirilib.

REDES çərçivəsində süni intellekt metodlarından istifadə edildiyini bildirən Memişoğlu deyib: “Süni intellekt metodları ilə riskləri daha çevik dəqiqləşdirməklə, problemlər ortaya çıxmazdan əvvəl müdaxilə edirik.”

Nazir sistemin Türkiyə üzrə tətbiq olunduğunu qeyd edib. Onun sözlərinə görə, REDES 81 vilayətdə 356 nümayəndə tərəfindən sahədə effektiv şəkildə istifadə olunur.

K.Memişoğlu bildirib ki, 34 müxtəlif istiqamət üzrə yaradılmış İdarəçi Məlumat Ekranı vasitəsilə risklərin rəhbərlər tərəfindən davamlı izlənilməsi təmin edilir.

Hazırladığımız qərar dəstəyi sistemləri vasitəsilə riskləri prioritetləşdirir, onların düzgün nəzarət üsulları ilə qiymətləndirilməsini və araşdırılmasını təmin edirik: “Son bir il ərzində 81 vilayətimizdə 9 988 nəzarət tədbiri həyata keçirmişik.

Güclü səhiyyə infrastrukturumuzu texnoloji imkanlarımızla daha da inkişaf etdirərək səhiyyə sistemimizi irəli aparmaq üçün fəaliyyətimizi qətiyyətlə davam etdirəcəyik”, – deyə nazir vurğulayıb.