ATU-nun Qulaq, burun, boğaz xəstəlikləri kafedrasının dosenti, Tədris Cərrahiyyə Klinikasının otorinolarinqologiya şöbəsinin müdiri Rəşad Talışınskinin sözlərinə görə, 16 yaşlı pasiyentdə burun tənəffüsünün ciddi şəkildə pozulması ilə əlaqədar kompleks cərrahi müdaxilə həyata keçirilib.

Klinikadan Aztibb.az-a verilən məlumata görə, pasiyent uşaq yaşlarında adenotomiya əməliyyatı keçirib, lakin son illərdə burun tənəffüsünün yenidən pisləşməsi müşahidə olunub. Aparılan müayinələr zamanı burun çəpərinin kəskin deformasiyası, aşağı burun çanaqlarının hipertrofiyası və adenoid toxumasının təkrar hipertrofiyası müəyyən edilib.

Bu səbəbdən pasiyentə planlı şəkildə cərrahi müdaxilə həyata keçirilib. Əməliyyat zamanı burun çəpərinin deformasiyası düzəldilib, aşağı burun çanaqları kiçildilib və adenoid toxuması endoskopik nəzarət altında xaric edilib. Çıxarılan toxuma histoloji müayinəyə göndərilib. Rəşad Talışınski əməliyyatöncəsi müayinələrin əhəmiyyətini də vurğulayıb. Onun sözlərinə görə, yanaşı xəstəliklərin və mümkün risklərin qiymətləndirilməsi məqsədilə zəruri hallarda kardioloq və pulmonoloqun müayinəsi vacibdir. Bu pasiyentdə də əməliyyatdan əvvəl aparılan müayinələr zamanı aritmiya aşkarlanıb.

Həkim qeyd edib ki, adenoid toxumasının təkrar böyüməsi fərdi xüsusiyyətlərdən asılıdır və xüsusilə allergik xəstəlikləri olan, tez-tez respirator infeksiyalara yoluxan uşaqlarda müşahidə oluna bilər. Adenoid toxumasını tamamilə kökündən xaric etmək hər zaman mümkün olmadığından, əsasən hipertrofiyaya uğramış hissə çıxarılır və bəzi hallarda əməliyyatdan sonra yenidən böyümə baş verə bilər. Uzunmüddətli adenoid hipertrofiyası burun tənəffüsünün pozulmasına, ağızdan nəfəsalmaya və yuxu keyfiyyətinin pisləşməsinə, həmçinin uşağın diqqət və yaddaş funksiyalarına, üz-çənə skeletinin inkişafına mənfi təsir göstərə bilər. Bu səbəbdən ifadəli adenoid hipertrofiyası olan uşaqların vaxtında müayinə və müalicəsi mühüm əhəmiyyət daşıyır.