"Diz ağrısı yalnız yaşlılara aiddir" - deyə düşünürsünüzsə, yanılırsınız. Diz ağrılarının yalnız yaşla əlaqəli olduğunu düşünmək yanlışdır. Son dövrlərdə 30–40 yaş arasında olan pasiyentlər arasında bu şikayətlərə daha tez-tez rast gəlirik.

Bu barədə Aztibb.az-a məlumat verən Ağcabədi Rayon Mərkəzi Xəstəxanasının həkim-travmatoloqu Çingiz Həsənov bildirib ki, oturaq həyat tərzi gündəlik hərəkətsizlik diz ətrafı əzələləri zəiflədir.

Onun sözlərinə görə, artıq çəki diz oynağına normadan artıq yük düşür. Uyğunsuz ayaqqabılar – yüksək daban və sərt altlıq oynaqlara zərər verir. Səhv idman hərəkətləri, düzgün edilməyən məşqlər dizin strukturunu poza bilər. Vitamin çatışmazlığı, xüsusilə D vitamini və kalsium azlığı da diz sağlamlığına mənfi təsir göstərə bilər.

"Uzun müddət yerdə və ya diz üstə oturmaq – diz oynaqlarına əlavə yük yarada bilər. Təəssüf ki, bəziləri illərlə bu ağrıları görməzlikdən gəlir, onları qocalıq əlaməti kimi qəbul edir. Amma nəticədə oynaq qığırdaqları sıradan çıxır, hərəkət məhdudlaşır və cərrahi müdaxilə qaçılmaz olur" - deyə həkim əlavə edib.