Tirzepatid piylənmə və 2-ci tip şəkərli diabetin müalicəsində istifadə olunan yeni nəsil preparatdır. Araşdırmalar onun bədən çəkisinin azaldılmasında semaqlutiddən daha yüksək effektivlik göstərdiyini ortaya qoyub.

Aztibb.az xəbər verir ki, endokrinoloq Yekaterina Yerşovanın sözlərinə görə, tirzepatid eyni anda iki inkretin hormonunun – GIP və GLP-1 reseptorlarına təsir edən ilk preparatdır. Bu mexanizm iştahanı azaldır, toxluq hissini artırır, qanda şəkərin nəzarətdə saxlanmasına və piy toxumasının azalmasına kömək edir.

Mütəxəssis bildirib ki, beynəlxalq SURMOUNT və SURPASS tədqiqatlarında preparat qəbul edən pasiyentlərdə 72 həftə ərzində bədən çəkisi 20,9 faizə qədər azalıb. Həmçinin tirzepatidin 2-ci tip diabetin inkişaf riskini 94 faiz azaltması da qeyd olunub.

Yerşova vurğulayıb ki, tirzepatid reseptlə təyin olunan güclü dərmandır və yalnız həkim nəzarəti altında istifadə edilməlidir. Preparatın öz göstərişləri və əks-göstərişləri var, nəzarətsiz istifadəsi isə xüsusilə mədə-bağırsaq sistemi ilə bağlı yan təsirlərə səbəb ola bilər.