Velosiped qəzası nəticəsində mədəaltı vəzi tam parçalanan 14 yaşlı yeniyetmənin orqanı mürəkkəb rekonstruktiv əməliyyatla bərpa edilib.

Aztibb.az xəbər verir ki, Rusiyanın Tatarıstan Respublikasından olan yeniyetmə velosipeddən yıxılarkən sükanın qarın nahiyəsinə güclü zərbə vurması nəticəsində mədəaltı vəzinin tam qopması ilə ağır xəsarət alıb. Nəticədə orqan fiziki olaraq iki hissəyə ayrılıb və mədəaltı vəz şirəsinin qarın boşluğuna axması fermentativ peritonitə səbəb olub.

Yerli xəstəxanada ilkin yardım göstərildikdən sonra ağır vəziyyətdə olan pasiyent Rusiya Uşaq Klinik Xəstəxanasına (RDKB) göndərilib. Həkimlər əvvəlcə güclü iltihabı və ödemi azaltmaq üçün konservativ müalicə aparıblar.

Vəziyyəti stabilləşdikdən sonra yeniyetmə üzərində rekonstruktiv əməliyyat həyata keçirilib. Cərrahlar mədəaltı vəzinin zədələnmiş hissələrini bərpa edib, orqanın ayrılmış hissəsinin funksiyasını qorumaq üçün onu nazik bağırsağın ilgəyinə birləşdiriblər.

Əməliyyat zamanı diametri təxminən 2 millimetr olan mədəaltı vəzi axacağının bütövlüyünün qorunmasına xüsusi diqqət yetirilib. Bunun üçün axacağa təxminən 1 millimetr diametrində kateter yerləşdirilib və onun üzərində bağırsaqla birləşmə yaradılıb.

Əməliyyatdan sonra qanda mədəaltı vəzi fermentlərinin səviyyəsi sürətlə azalıb, həzm şirəsinin bağırsağa normal axını bərpa olunub. Yeniyetmə əməliyyatdan 10 gün sonra xəstəxanadan evə buraxılıb.

Hazırda onun yalnız müntəzəm müayinələrdən keçməsi və həkim nəzarətində olması tələb olunur.