Qrip testinin müsbət nəticəsindən sonra ilk 6 saat ərzində oseltamivir qəbul edən ambulator xəstələrdə xəstəxanaya yerləşdirilmə və reanimasiya şöbəsinə düşmə riskinin daha aşağı olduğu müəyyən edilib.
Aztibb.az xəbər verir ki, ABŞ-da aparılan araşdırmada 2022–2024-cü illərdə qrip diaqnozu qoyulmuş 28 920 yetkin veteranın məlumatları təhlil olunub. Onlardan 12 185 nəfəri diaqnozdan sonra ilk 6 saat ərzində oseltamivir qəbul edib, 16 735 nəfər isə bu müddətdə preparat almayıb.
Nəticələrə görə, oseltamivir qəbul edənlərdə 10 gün ərzində hər hansı səbəbdən xəstəxanaya yerləşdirilmə riski müalicə almayanlarla müqayisədə 45 faiz aşağı olub. Reanimasiya şöbəsinə yerləşdirilmə riski isə 53 faiz azalıb.
Bununla yanaşı, 30 gün ərzində ölüm riski iki qrup arasında əhəmiyyətli fərqlənməyib.
Tədqiqat müəllifləri nəticələrin ambulator şəraitdə oseltamivir müalicəsinin xəstəxanaya yerləşdirilmə və reanimasiya şöbəsinə qəbul riskini azaltmaq baxımından faydasını dəstəklədiyini bildiriblər.
Araşdırma “Open Forum Infectious Diseases” jurnalında dərc olunub. Müəlliflər qeyd edirlər ki, simptomların başlanma vaxtının dəqiq müəyyənləşdirilməməsi və müalicənin tam başa çatdırılmasının təsdiqlənə bilməməsi tədqiqatın əsas məhdudiyyətlərindəndir.
