Münhendə təqdim olunan yeni tədqiqatın nəticələrinə görə, atrial fibrilasiyası və insult riski orta səviyyədə olan xəstələrdə birbaşa təsirli oral antikoaqulyantların (DOAK) istifadəsi ciddi klinik ağırlaşmaların riskini əhəmiyyətli dərəcədə azalda bilər.

Aztibb.az xəbər verir ki, “SINGLE-AF” adlı randomizə edilmiş tədqiqatda Cənubi Koreyada 1803 atrial fibrilasiyalı pasiyent iştirak edib. Onlar DOAK müalicəsi alan və antikoaqulyant qəbul etməyən iki qrupa bölünüb və orta hesabla 2 il izlənilib.

24 ay ərzində insult, sistemik emboliya, ciddi qanaxma və ürək-damar səbəbindən ölümün daxil olduğu əsas göstərici DOAK qəbul edənlərin 0,5 faizində, antikoaqulyant qəbul etməyənlərin isə 1,5 faizində qeydə alınıb. Bu, ağırlaşmaların nisbi riskinin 69 faiz azalması deməkdir.

İnsult DOAK qrupunda 0,3 faiz, digər qrupda isə 1,1 faiz təşkil edib. Eyni zamanda, ciddi qanaxma hallarında əhəmiyyətli fərq müşahidə olunmayıb: müvafiq olaraq 0,3 və 0,5 faiz.

Bununla belə, tədqiqatçılar nəticələrin ehtiyatla qiymətləndirilməli olduğunu bildirirlər. Əsas göstəricilər üzrə cəmi 17 hadisənin qeydə alınması müalicənin faydasının olduğundan daha yüksək görünməsinə səbəb ola bilər.

Bundan əlavə, tədqiqata yalnız Cənubi Koreyadan olan pasiyentlərin daxil edilməsi, qadınların sayının az olması və iştirakçıların əksəriyyətində atrial fibrilasiyanın tutmaşəkilli olması nəticələrin digər əhali qruplarına tətbiqini məhdudlaşdırır.

Mütəxəssislər hesab edirlər ki, nəticələri təsdiqləmək üçün daha geniş tədqiqatlara ehtiyac var.