Araşdırmaya görə, diabet diaqnozu qoyulan qadınlarda sonradan psixi sağlamlıq problemlərinin yaranma ehtimalı kişilərlə müqayisədə daha yüksəkdir.

Aztibb.az xəbər verir ki, tədqiqat zamanı diabetli şəxslərdə hipertoniya, ürək-damar və böyrək xəstəlikləri, həmçinin psixi sağlamlıq pozuntuları araşdırılıb. İştirakçıların 39 faizində izləmə müddətində bu problemlərdən ən azı biri inkişaf edib.

Hipertoniya həm qadınlarda, həm də kişilərdə ən çox rast gəlinən yanaşı xəstəlik olub. Qadınların 20,2 faizində, kişilərin isə 21,1 faizində hipertoniya qeydə alınıb.

Psixi sağlamlıq problemləri qadınlarda daha çox müşahidə edilib. Qadınların 8,1 faizində diabetdən sonra narahatlıq, depressiya və ya somatoform pozuntu yaranıb. Bu göstərici kişilərdə 5,3 faiz təşkil edib. Xüsusilə 16–39 yaşlı qadınlarda risk daha yüksək olub.

Bunun əksinə, ürək-damar xəstəlikləri və son mərhələ böyrək çatışmazlığı kişilərdə daha çox qeydə alınıb: kişilərin 8,4 faizində, qadınların isə 5,3 faizində bu diaqnozlardan biri qoyulub.

Tədqiqat müəllifləri qeyd edirlər ki, nəticələr bu xəstəliklərin qadınlarda mütləq daha çox yarandığını sübut etmir. Qadınların ilkin səhiyyə xidmətlərinə daha çox müraciət etməsi bəzi problemlərin daha erkən aşkarlanmasına səbəb ola bilər.

Mütəxəssislər diabetli bütün pasiyentlərdə qan təzyiqi, böyrək funksiyası, ürək-damar riski və psixi sağlamlığın mütəmadi qiymətləndirilməsini, həmçinin psixoloji skrininqin diabetə nəzarətin standart hissəsinə çevrilməsini tövsiyə edirlər.