Melanomanın müalicəsi üçün hazırlanmış Rusiyanın fərdiləşdirilmiş vaksinini qəbul edən ilk pasiyentin müalicəsi uğurla davam edir.

Aztibb.az "RİA Novosti" agentliyinə istinadən yazır ki, bu barədə Rusiya Səhiyyə Nazirliyinin N. F. Qamaleya adına Milli Epidemiologiya və Mikrobiologiya Tədqiqat Mərkəzinin elmi rəhbəri Aleksandr Qintsburq məlumat verib.

Söhbət Qamaleya Mərkəzinin mütəxəssisləri tərəfindən Rusiya Səhiyyə Nazirliyinin Milli Tibbi Radiologiya Tədqiqat Mərkəzi ilə birgə hazırlanmış "NEOONKOVAK" preparatından gedir. Həmin pasiyent melanoma müalicəsi çərçivəsində bu vaksini alan ilk şəxs olub.

"İlk xəstə uğurla müalicə olunur", – deyə Qintsburq qeyd edib.

Buna qədər akademik bildirmişdi ki, pasiyent Rusiya istehsalı olan preparatla vaksinasiya kursunu sentyabr ayında tamamlamalıdır. Qeyd edək ki, bu preparat profilaktik deyil, artıq mövcud xəstəliyin müalicəsi üçün nəzərdə tutulan terapevtik onkovaksinlər kateqoriyasına aiddir.

"NEOONKOVAK" bu sahədə yeganə yerli elmi nailiyyət deyil. 2025-ci ilin noyabrında Səhiyyə Nazirliyi kolorektal xərçəngin müalicəsi üçün Federal Tibbi-Bioloji Agentliyin (FMBA) hazırladığı "Onkopept" fərdiləşdirilmiş terapevtik onkovaksininin klinik praktikada tətbiqinə icazə verib.