Böyük Britaniyada ishal və digər həzm sistemi problemlərinə səbəb olan giardioz xəstəliyinə yoluxma halları son 10 ilin ən yüksək səviyyəsinə çatıb.

Aztibb.az xəbər verir ki, Böyük Britaniya Sağlamlıq Təhlükəsizliyi Agentliyinin (UKHSA) məlumatına görə, 2025-ci ildə İngiltərədə 6069 giardioz halı qeydə alınıb. Bu, 2024-cü illə müqayisədə 619 hal və ya 11,4 faiz artım deməkdir. Göstərici 2016-cı ildən bəri ən yüksək səviyyədir.

Giardioz Giardia duodenalis (Giardia intestinalis) adlı parazitin törətdiyi bağırsaq infeksiyasıdır. Xəstəliyin ən geniş yayılmış əlaməti ishaldır. Qarın sancıları, köp, gəyirmə, qaz və çəki itkisi də müşahidə oluna bilər.

İnfeksiya əsasən çirkli su və qida, hovuz və digər rekreasiya suları, həmçinin yoluxmuş şəxslə birbaşa təmas vasitəsilə yayılır. Böyük Britaniyada beynəlxalq səyahətlər də risk amillərindən biri hesab olunur.

2025-ci ildə ən yüksək yoluxma göstəricisi Londonda qeydə alınıb. Ən çox hal 30-39 yaş qrupunda müşahidə edilib və ümumi halların 64,2 faizi kişilərin payına düşüb.

Mütəxəssislər son illərdə artımın səbəbləri arasında daha həssas PCR testlərinin geniş tətbiqini, səyahətlərin artmasını, eləcə də iqlim və ətraf mühitdəki dəyişiklikləri nəzərdən keçirirlər.