ATU-nun Tədris Cərrahiyyə Klinikasında 33 yaşlı qadın pasiyentə daşlı xolesistit diaqnozu ilə laparoskopik xolesistektomiya əməliyyatı icra olunub.

ATU-nun I cərrahi xəstəliklər kafedrasının assistenti, Tədris Cərrahiyyə Klinikasının cərrahı Azər Qasımov Aztibb.az-a bildirib ki, pasiyent sağ qabırğaaltı nahiyədə davamlı və tutmaşəkilli ağrılarla klinikaya müraciət edib. Aparılan müayinələr nəticəsində öd kisəsində daşlar aşkarlanıb və pasiyentə daşlı xolesistit diaqnozu qoyulub.

Cərrahın sözlərinə görə, pasiyentdə əməliyyata əks göstəriş olmadığından minimal invaziv üsulla laparoskopik xolesistektomiyanın icrasına qərar verilib. Bu üsul geniş cərrahi kəsiyə ehtiyac olmadan həyata keçirildiyi üçün əməliyyatdan sonrakı ağrıların daha az olması, pasiyentin erkən aktivləşməsi və bərpa dövrünün daha rahat keçməsi baxımından üstünlüklərə malikdir.

Azər Qasımov qeyd edib ki, pasiyentin artıq çəkisi də cərrahi yanaşmanın seçimində nəzərə alınan amillərdən biri olub. Laparoskopik üsulla öd kisəsinin xaric edilməsi pasiyent üçün daha az travmatik hesab olunur və əməliyyatın təxminən 40 dəqiqə ərzində yekunlaşdırılması planlaşdırılır.