Ürək tutmasından sonra hərəkətsiz qalmaq sağalma prosesinə mənfi təsir göstərə bilər. Yeni araşdırmaya görə, gündə cəmi 30 dəqiqə oturmağın yüngül fiziki aktivliklə, o cümlədən sakit gəzinti ilə əvəzlənməsi təkrar infarkt riskini 50 faiz azalda bilər.

Aztibb.az xəbər verir ki, Kolumbiya Universitetinin Tibb Mərkəzində aparılan araşdırmada infarkt keçirmiş və ya döş qəfəsində ağrı səbəbilə xəstəxanaya yerləşdirilmiş 600 nəfər iştirak edib. İştirakçılar xəstəxanadan çıxdıqdan sonra bir ay ərzində fiziki aktivliklərini izləyən cihazlardan istifadə ediblər və onların sağlamlıq vəziyyəti bir il ərzində müşahidə olunub.

Nəticələr göstərib ki, gündə 30 dəqiqə oturmağın gəzinti ilə əvəzlənməsi təkrar infarkt riskini 50 faiz, daha intensiv fiziki aktivlik isə 61 faiz azaldır. Oturma vaxtının 30 dəqiqə yuxu ilə əvəzlənməsi də riskin 14 faiz azalması ilə əlaqələndirilib.

Tədqiqatçılar uzun müddət fasiləsiz oturmağın qan dövranına, arterial təzyiqə və iltihabi proseslərə mənfi təsir göstərə biləcəyini bildirirlər. Hər 30 dəqiqədən bir 5 dəqiqəlik yüngül gəzinti isə oturmanın bəzi mənfi təsirlərini azaltmağa kömək edə bilər.