Hepatit C qaraciyəri zədələyən virus infeksiyasıdır. Əsasən yoluxmuş qan vasitəsilə ötürülür. Buna görə steril olmayan tibbi və kosmetoloji alətlər, eləcə də digər qanla təmas halları risk yarada bilər. Bəzən xəstəlik uzun müddət heç bir əlamət vermədən davam edə bilər. Bu səbəbdən insan özünü sağlam hiss etsə belə, infeksiyanın olub-olmadığını yalnız müvafiq müayinələrlə müəyyən etmək mümkündür.

Bu barədə Aztibb.az-a Xəzər Tibb Mərkəzinin həkim-infeksionisti İlahə Əsədova məlumat verib.

İlahə Əsədova qeyd edib ki, müasir antiviral müalicə ilə hepatit C-nin tam sağalması mümkündür. Müalicə həkim tərəfindən aparılan müayinələrin nəticələrinə əsasən müəyyən edilir.

Mütəxəssisin sözlərinə görə, hepatit C adi məişət təması, qucaqlaşma, əl sıxma və eyni süfrədə yemək vasitəsilə ötürülmür. Əsas risk yoluxmuş qanla təmas zamanı yaranır. Steril tibbi və kosmetoloji alətlərdən istifadə etmək, qanla təmasdan qorunmaq və riskli hallarda vaxtında müayinədən keçmək yoluxma riskini azaltmağa kömək edir.