Elmi-Tədqiqat Ağciyər Xəstəlikləri Mərkəzi tərəfindən Şəmkir Regional Mərkəzi Xəstəxanasında “Vərəmin aşkarlanmasında ilkin səhiyyə xidmətinin rolu” mövzusunda təlim keçirilib. Tədbirdə xəstəxananın baş həkimi Samirə Kazımova və tibb heyəti iştirak edib.

Aztibb.az xəbər verir ki, təlimdən öncə Ağciyər Xəstəlikləri Mərkəzinin fəaliyyətini və struktur bölmələrini əks etdirən videoçarx nümayiş olunub.

Tədbirdə çıxış edən baş həkim Samirə Kazımova vərəmin erkən diaqnostikasında ilkin səhiyyə xidmətinin əhəmiyyətindən bəhs edib. O, risk qrupuna daxil olan şəxslərin vaxtında müayinələrə cəlb olunmasının, şübhəli halların düzgün qiymətləndirilməsinin və pasiyentlərin ixtisaslaşdırılmış tibb müəssisələrinə operativ yönləndirilməsinin vacibliyini vurğulayıb.

Təlim çərçivəsində iştirakçılara vərəmin əsas klinik əlamətləri — uzunmüddətli öskürək, gecə tərləmələri, ümumi halsızlıq, iştahasızlıq və səbəbsiz çəki itkisi barədə ətraflı məlumat verilib.

Həmçinin görüşdə müalicə prosesinə sadiqliyin artırılması, dərman preparatlarının xəstələrə vaxtında çatdırılması, VOT (videonəzarətli müalicə) xidmətinin tətbiqi və üstünlükləri müzakirə edilib.

Qeyd olunub ki, ilkin səhiyyə xidməti ilə vərəm əleyhinə tibb müəssisələri arasında qurulan sıx və əlaqəli əməkdaşlıq infeksiyanın yayılmasının qarşısının alınmasında və müalicənin effektivliyində mühüm rol oynayır.

Təlim təqdimatlar, sual-cavab sessiyası və qarşılıqlı müzakirələrlə yekunlaşıb.