Şamaxı Rayon Mərkəzi Xəstəxanasında “Vərəmin erkən aşkarlanmasında ilkin səhiyyə xidmətlərinin rolu” mövzusunda təlim keçirilib.

Bu barədə Aztibb.az-a Şamaxı RMX-dan məlumat verilib.

Bildirilib ki, təlim zamanı vərəmin erkən mərhələdə aşkarlanmasının əhəmiyyəti, xəstəliyin əsas əlamətləri, risk qruplarının müəyyənləşdirilməsi və ilkin səhiyyə xidmətləri səviyyəsində vərəmdən şübhələnilən şəxslərə yanaşma barədə ətraflı məlumat verilib.

Təlimdə Ağciyər Xəstəlikləri Mərkəzi İsmayıllı Regional Xəstəxanasının baş həkimi Anar Məmmədov çıxış edərək vərəmin vaxtında aşkarlanması və müalicəyə cəlb olunmasının xəstəliyin yayılmasının qarşısının alınmasında mühüm rol oynadığını vurğulayıb. Həmçinin ilkin səhiyyə xidmətlərinin vərəmlə mübarizədə əhəmiyyəti, xəstələrin düzgün istiqamətləndirilməsi və profilaktik tədbirlər barədə geniş məlumat təqdim edib.

Təlim səhiyyə əməkdaşlarının vərəmin erkən aşkarlanması və xəstəliyə qarşı mübarizə istiqamətində bilik və bacarıqlarının artırılması baxımından faydalı olub.