ABŞ-da 12 milyondan çox insanın məlumatları əsasında aparılan araşdırma pilotlar və kabin heyəti üzvlərində radiasiya ilə əlaqəli xərçənglərdən ölüm riskinin digər peşə qrupları ilə müqayisədə daha yüksək olduğunu göstərib.

Aztibb.az CNN Türk-ə istinadən yazır ki, araşdırmada 500-dən çox peşə qrupu üzrə radiasiya ilə əlaqəli xərçənglərdən ölüm halları müqayisə edilib. 

Alimlər əsasən leykemiya, limfoma və çoxsaylı mieloma ilə yanaşı, dəri, süd vəzi, qalxanabənzər vəz, prostat və mərkəzi sinir sistemi xərçəngləri də daxil olmaqla radiasiya ilə əlaqəli hesab edilən xəstəliklərdən ölüm göstəricilərini araşdırıblar.

Ən yüksək risk kabin heyəti üzvlərindədir

Nəticələrə görə, radiasiya ilə əlaqəli xərçənglərdən ölüm göstəricisi ən yüksək olan peşə qrupu kabin heyəti üzvləri olub. Pilotlar isə ikinci sırada qərarlaşıb.

Araşdırmaya əsasən, kabin heyəti üzvlərinin bu xərçənglərdən ölüm ehtimalı digər peşə qruplarının nümayəndələri ilə müqayisədə 50 faiz daha yüksəkdir. Pilotlarda isə riskin digər peşələrlə müqayisədə 36 faiz artdığı müəyyənləşdirilib.

Tədqiqatçılar pilot və kabin heyəti üzvlərində radiasiya ilə əlaqələndirilən müxtəlif xərçəng növlərindən ölüm riskinin nəzərəçarpacaq dərəcədə yüksək olduğunu bildiriblər.

Mütəxəssislər bu nəticələrin aviasiya sahəsində çalışanların peşə fəaliyyətləri zamanı məruz qala biləcəyi radiasiya faktorlarının sağlamlıq baxımından daha ətraflı araşdırılmasının vacibliyini göstərdiyini qeyd edirlər.

Araşdırmanın nəticələri nüfuzlu tibbi jurnal JAMA-da dərc olunub.