İdman zalına gedir, müntəzəm məşq edir və fiziki aktiv olmağa çalışırsınız, amma günün böyük hissəsini masa arxasında oturaraq keçirirsinizsə, bu, sağlamlıq üçün əlavə risk yarada bilər.

Aztibb.az "Medvestik"ə istinadən yazır ki, uzun müddət fasiləsiz oturmaq qan dövranının zəifləməsinə, damarların fəaliyyətinin dəyişməsinə və maddələr mübadiləsinin ləngiməsinə səbəb ola bilər. Araşdırmalar uzun müddət oturaq qalma ilə ürək-damar xəstəlikləri və digər sağlamlıq problemləri arasında əlaqə olduğunu göstərir.

Buna görə də gün ərzində müntəzəm olaraq ayağa qalxmaq və hərəkət etmək vacibdir. Hər 30 dəqiqədən bir ən azı 2 dəqiqə ayağa qalxın, bir qədər gəzin, dartınma hərəkətləri edin və ya bir neçə çömbəlmə hərəkəti yerinə yetirin. Kiçik fasilələr belə gün ərzində hərəkətsiz keçirdiyiniz vaxtı azaltmağa və orqanizmin fəaliyyətini dəstəkləməyə kömək edə bilər.