Konqo Demokratik Respublikası Ebola epidemiyası ilə mübarizəyə kömək edə biləcək 16 min 200 dozadan ibarət “Ervebo” peyvəndinin ilk partiyasını alıb.

Aztibb.az AZƏRTAC-a istinadla xəbər verir ki, bu barədə “Associated Press” agentliyi məlumat yayıb.

Vaksinlər dünən axşam Konqo Demokratik Respublikasının paytaxtı Kinşasadakı N'Djili Beynəlxalq Hava Limanına çatdırılıb. Ümumdünya Səhiyyə Təşkilatı və tərəfdaşları 70 min doza vaksin tədarük etməyi öhdələrinə götürüblər. Növbəti həftə əlavə çatdırılmalar gözlənilir.

Lakin ÜST aydınlıq gətirib ki, “Ervebo”nun insanlarda Ebola virusunun Bundibugyo ştammına qarşı effektivliyi hələ təsdiqlənməyib. Erkən laboratoriya testləri göstərir ki, “Ervebo” Ebolaya qarşı müəyyən qoruma təmin edə bilər, lakin daha qəti nəticələr əldə etmək üçün əlavə klinik sınaqlara ehtiyac var.

Agentliyin məlumatına görə, hazırda Bundibugyo ştammı üçün təsdiqlənmiş peyvənd və ya müalicə yoxdur. Bundan əlavə, virus asanlıqla və bəzən aşkarlanmadan yayılır, çünki onun simptomları malyariya da daxil olmaqla, digər xəstəliklərlə qarışdırıla bilər.

Bu günə qədər 5200-dən çox virusa yoluxma hadisəsi, o cümlədən 2500-dən çox ölüm halı qeydə alınıb. Afrika Xəstəliklərə Nəzarət və Profilaktika Mərkəzləri qeyd edib ki, yoluxma nisbəti hələ pik həddə çatmayıb və mövcud rəqəmlərdən üç dəfə çox ola bilər.