Səhiyyə Nazirliyi Samux rayonunun Alıuşağı kəndində qeydə alınmış qarayara hadisəsi ilə bağlı son vəziyyəti açıqlayıb. Qurumun məlumatına görə, ərazidə həyata keçirilən operativ profilaktik və əks-epidemik tədbirlər nəticəsində vəziyyət tam sabitləşib, avqustun 15-dən etibarən isə yeni yoluxma faktı aşkarlanmayıb.

Aztibb.az Nazirliyin məlumatına istinadən yazır ki, hadisə qeydə alındıqdan dərhal sonra aidiyyəti qurumlar tərəfindən zəruri epidemioloji və profilaktik tədbirlərə başlanılıb. Aparılan araşdırmalar zamanı xəstələrlə təmasda olmuş bütün şəxslər müəyyənləşdirilərək tibbi müşahidəyə götürülüb və laborator müayinələr aparılıb. Eyni zamanda hadisənin baş verdiyi təsərrüfatda epizootoloji araşdırmalar həyata keçirilib, laborator analizlər üçün müvafiq nümunələr toplanıb.

Hazırda infeksiya aşkarlanmış şəxslər tibb müəssisəsində müalicələrini davam etdirirlər. Təmasda olan şəxslər arasında yeni yoluxma halı müəyyən edilməyib və onların üzərində zəruri tibbi nəzarət təmin olunub. Aidiyyəti qurumlarla birgə görülən operativ tədbirlər sayəsində xəstəliyin əhali arasında yayılma riski tam aradan qaldırılıb.

Nazirlik ərazidəki epidemioloji vəziyyətə nəzarəti davam etdirir.

Xatırladaq ki, qarayara əsasən xəstə və ya tələf olmuş heyvanlarla, eləcə də onların yoluxmuş toxuma və məhsulları ilə birbaşa təmas nəticəsində insana keçən zoonoz infeksiyadır. Xəstəliyin insandan-insana ötürülməsi olduqca nadir hallarda baş verir.