Mərkəzi Gömrük Hospitalında tibb bacılarının təcili tibbi yardım və reanimasiya üzrə bilik və bacarıqlarının artırılması məqsədilə ürək-ağciyər reanimasiyası (CPR) üzrə təlimlər mütəmadi olaraq həyata keçirilir.

Hospitaldan Aztibb.az-a verilən məlumata görə, bu dəfəki təlimdə Mərkəzi Gömrük Hospitalının baş tibb bacısı Gülyaz Fərəcova və böyük tibb bacısı Ətayə Vəliyeva tibb bacılarına ürək dayanması zamanı göstərilməli olan ilkin yardım, ürək-ağciyər reanimasiyasının əsas qaydalarını və düzgün müdaxilə üsullarını izah ediblər.

Təlimin praktiki hissəsində isə tibb bacıları öyrəndikləri reanimasiya tədbirlərini CPR təlim manekenlərinin üzərində tətbiq edərək real vəziyyətə mümkün qədər yaxın şəraitdə məşq ediblər. Praktiki məşğələlər zamanı tibb bacılarının düzgün müdaxilə ardıcıllığı, çevik qərarvermə və CPR texnikası üzrə praktiki bacarıqları möhkəmləndirilib.

Qeyd edək ki, mütəmadi olaraq keçirilən təlim proqramı Mərkəzi Gömrük Hospitalının bütün tibb bacılarını əhatə edəcək. Unutmayaq: CPR zamanı hər saniyə önəmlidir. Vaxtında və düzgün müdaxilə bir insanın həyatını xilas edə bilər!