Naxçıvan Muxtar Respublikası Səhiyyə və Fövqəladə Hallar nazirliklərinin birgə təşkilatçılığı ilə əhalinin fövqəladə hallardan qorunması və bu sahədə maarifləndirilməsi məqsədilə Naxçıvan Muxtar Respublikası Səhiyyə Nazirliyində maarifləndirici tədbir keçirilib.

Bu barədə Aztibb.az-a Naxçıvan MR Səhiyyə Nazirliyindən məlumat verilib.

Bildirilib ki, tədbirdə Naxçıvan Muxtar Respublikası Fövqəladə Hallar Nazirliyinin Fövqəladə halların xəbərdar edilməsi və nəticələrinin aradan qaldırılması idarəsinin əməkdaşları tərəfindən iştirakçılara təbii və texnogen xarakterli fövqəladə hadisələr zamanı düzgün davranış qaydaları barədə zəruri məlumatlar çatdırılıb.

Tədbirdə fövqəladə halların təsnifatı, muxtar respublika ərazisi üçün xarakterik olan fövqəladə hallar, fövqəladə hallar zamanı davranış qaydaları, yanğın təhlükəsizliyi tələbləri, dəm qazı təhlükəsindən qorunma yolları, yay mövsümündə dənli və texniki bitki sahələrində, habelə meşə ərazilərində yanğın təhlükəsizliyinin təmin edilməsi, həmçinin Fövqəladə Hallar Nazirliyinin 112 qaynar telefon xəttinin və Dövlət Yanğından Mühafizə hissələrinin 101 xidmət nömrəsinin təyinatı barədə ətraflı məlumat verilib.

İnteraktiv formada keçirilən tədbir zamanı iştirakçıları maraqlandıran suallar ətraflı cavablandırılıb.

Tədbir çərçivəsində videoçarxlar nümayiş etdirilib, slayd təqdimatları göstərilib.