Özbəkistana səfərdə olan azərbaycanlı jurnalistlər Daşkənddə yerləşən Milli Uşaq Tibb Mərkəzini ziyarət ediblər.
Aztibb.az Vesti.az-a istinadən xəbər verir ki, media nümayəndələri tibb müəssisəsinin fəaliyyəti, ixtisaslaşmış şöbələri, uşaqların diaqnostikası və müalicəsində tətbiq olunan yüksək texnologiyalı üsullarla tanış olublar.
280 çarpayılıq mərkəzdə 12 stasionar və 10 əlavə xidmət şöbəsi fəaliyyət göstərir. Burada kardiologiya və ürək cərrahiyyəsi, neyrocərrahiyyə, nevrologiya, uro-nefrologiya və digər istiqamətlər üzrə ixtisaslaşmış tibbi yardım göstərilir. Mərkəzdə müasir texnologiyalardan və minimal invaziv cərrahiyyə üsullarından istifadə olunur.
2024-cü ildə mərkəz Özbəkistanda beynəlxalq JCI akkreditasiyası alan ilk dövlət tibb müəssisəsi olub.
Səfər çərçivəsində jurnalistlərə Özbəkistanda səhiyyənin inkişafı və müasir tibbi infrastrukturun qurulması istiqamətində həyata keçirilən layihələr barədə də məlumat verilib.
