Sumqayıt Tibb Mərkəzində “Vərəmin aşkarlanmasında ilkin səhiyyə xidmətinin rolu” mövzusunda təlim keçirilib.
STM-dən Aztibb.az-a bildirilib ki, təlimdə Mərkəzin tabeliyində fəaliyyət göstərən tibb müəssisələrinin pediatr və terapevtləri iştirak ediblər.
Tədbiri giriş nitqi ilə açan Sumqayıt Tibb Mərkəzinin direktor müavini, İlkin səhiyyə xidmətinin rəhbəri Namirə Abbasova vərəmin erkən aşkarlanmasında ilkin səhiyyə müəssisələrinin mühüm rolundan danışıb. O, risk qrupuna daxil olan şəxslərin vaxtında müəyyənləşdirilməsinin, şübhəli halların düzgün istiqamətləndirilməsinin və tibb müəssisələri arasında koordinasiyalı fəaliyyətin vacibliyini vurğulayıb.
Təlim Abşeron Regional Xəstəxanasının İdarəetmə aparatının baş həkimi Aygün Xəlilova və xəstəxananın Ambulator şöbəsinin müdiri Səadət Hüseynova tərəfindən aparılıb. Təlimçilər vərəmin erkən aşkarlanmasının xəstəliyin yayılmasının qarşısının alınmasında və müalicənin effektivliyinin artırılmasında mühüm rol oynadığını bildiriblər. Onlar risk qrupuna daxil olan şəxslərin vaxtında müayinəyə cəlb edilməsi, vərəmə şübhəli halların düzgün qiymətləndirilməsi və ixtisaslaşdırılmış tibb müəssisələrinə operativ yönləndirilməsi barədə iştirakçılara ətraflı məlumat veriblər. Həmçinin ilkin səhiyyə xidməti ilə vərəm əleyhinə xidmət arasında əlaqələndirilmiş fəaliyyətin əhəmiyyəti vurğulanıb.
Təlim zamanı Azərbaycanda vərəmlə mübarizə xidmətinin inkişaf mərhələləri, mövcud epidemioloji vəziyyət, Ağciyər Xəstəlikləri Mərkəzinin strukturu və fəaliyyət istiqamətləri barədə ətraflı məlumat verilib.
İştirakçılara vərəmin aktiv və passiv aşkarlanması, risk qruplarının skrininqi, latent vərəm infeksiyası, tuberkulin diaqnostikası, Mantu sınağı, Diaskintest və gamma-interferon testlərinin tətbiqi ilə bağlı məlumatlar təqdim olunub.
Həmçinin vərəm xəstələrinin müalicəsinin təşkili, müalicəyə davamlılığın artırılması, dərmanların pasiyentlərin ünvanına çatdırılmasını nəzərdə tutan VOT xidmətinin əhəmiyyəti və müalicə nəticələrinin qiymətləndirilməsi məsələlərinə toxunulub.
Videotəqdimatlarla müşayiət olunan təlim iştirakçıların suallarının cavablandırılması, qarşılıqlı müzakirə və yekun tövsiyələrin səsləndirilməsi ilə başa çatıb.
