Hər gün pomidor yemək qaraciyərdə yağlanmanı azaltmağa kömək edə bilər

Aztibb.az xəbər verir ki, yeni araşdırma hər gün pomidor və pomidor sousu qəbulunun metabolik disfunksiya ilə əlaqəli qaraciyər xəstəliyi (MASLD) olan insanlarda qaraciyərdə yağ yığılmasını azaltmağa kömək edə biləcəyini göstərib.

“Nutrients” jurnalında dərc olunan tədqiqatda MASLD diaqnozu qoyulmuş 79 yetkin iştirak edib. İştirakçılar iki qrupa bölünüb. Bir qrup pomidorsuz qidalanıb, digər qrup isə 6 həftə ərzində hər gün 200 qram çiy pomidor və 50 qram pomidor sousu qəbul edib.

Nəticələr göstərib ki, hər iki qrupda qaraciyər yağlanması azalıb, lakin pomidor qəbul edənlərdə azalma daha çox olub. Bununla belə, qaraciyər sərtliyi, qaraciyər fermentləri, xolesterin göstəriciləri, bədən kütləsi indeksi və digər metabolik göstəricilərdə əhəmiyyətli dəyişiklik aşkarlanmayıb.

Tədqiqatçılar pomidorun qaraciyərdə yağ toplanmasına təsirinin artıq çəki və bədən piylənməsində əsaslı dəyişiklik olmadan baş verə biləcəyini bildirirlər. Lakin araşdırmanın cəmi 6 həftə davam etməsi, iştirakçıların əksəriyyətinin kişi olması və müəyyən risk qruplarının tədqiqatdan kənarda saxlanılması nəticələrin ümumiləşdirilməsini məhdudlaşdırır.

Mütəxəssislər nəticələrin ümidverici olsa da, ilkin xarakter daşıdığını vurğulayırlar. Pomidorun MASLD-in müalicəsində rolunu müəyyənləşdirmək üçün daha böyük və uzunmüddətli tədqiqatlara ehtiyac var. Mütəxəssislərin fikrincə, pomidor sağlam qidalanmanın, xüsusilə Aralıq dənizi pəhrizinin bir hissəsi ola bilər, lakin qaraciyər xəstəliyinin müalicəsində əsas yanaşmaları əvəz etmir.