ABŞ-ın Oreqon Sağlamlıq və Elm Universitetinin alimləri meymunlar üzərində apardıqları araşdırmada HİV-ə bənzər virusun erkən mərhələdə üçlü müalicə ilə orqanizmdən tamamilə təmizlənə biləcəyini müəyyən ediblər.

Aztibb.az xəbər verir ki, “Nature Microbiology” jurnalında dərc olunan tədqiqatda 55 körpə rezus makakası üzərində araşdırma aparılıb. Meymunlar simian-insan immunçatışmazlığı virusuna (SHIV) məruz qaldıqdan 72 saat sonra 8 heyvana üç müalicə – antiretrovirus terapiyası (ART), iki geniş neytrallaşdırıcı anticisim və eksperimental monoklonal anticisim olan leronlimab tətbiq edilib.

Müalicə 27 həftə davam edib. Sonrakı müşahidələr zamanı üçlü terapiya alan 8 meymunun heç birində virusun yenidən aktivləşməsi qeydə alınmayıb. Altı aydan çox müddətdə qanda virus DNT-si aşkarlanmayıb, 84 həftə sonra götürülən toxuma nümunələrində də virus müəyyən edilməyib.

Tədqiqatçılar bildirirlər ki, yalnız ART və ya iki komponentli müalicə virusu tamamilə aradan qaldırmayıb və müalicə dayandırıldıqdan sonra virus yenidən aktivləşib. Üçlü yanaşmanın isə virusun orqanizmdə qalıcı rezervuar yaratmasının qarşısını ala biləcəyi ehtimal edilir.

Alimlər nəticələrin insan körpələrinə birbaşa tətbiq edilə biləcəyini hələ təsdiqləmirlər. İnsanlarda müalicənin təhlükəsizliyi, uyğun dozaları və infeksiyadan neçə gün sonra effektiv olduğu müəyyən edilməlidir. Xüsusilə doğuş zamanı HİV-ə yoluxma riski yüksək olan körpələr üçün bu yanaşmanın gələcəkdə əhəmiyyətli ola biləcəyi düşünülür.