2-ci tip diabet və ürək-damar xəstəliyi olan insanlarda tirzepatid preparatının istifadəsi infarkt və digər ciddi ürək-damar hadisələri riskinin azalması ilə əlaqələndirilib.

Aztibb.az xəbər verir ki, The BMJ jurnalında dərc olunan araşdırmada 2-ci tip diabet və ürək-damar xəstəliyi olan 53 minə yaxın insanın klinik məlumatları təhlil edilib. İştirakçıların bir qismi tirzepatid, digər qismi isə sitagliptin qəbul edib.

Bir ildən sonra tirzepatid qəbul edənlərdə infarkt, insult və digər ciddi ürək-damar hadisələrini əhatə edən əsas göstəricinin riski 2,9 faiz, sitagliptin qrupunda isə 4,4 faiz olub.

Tirzepatid qəbul edənlərdə infarkt riski sitagliptinlə müqayisədə 33 faiz aşağı olub. Tədqiqatçılar hesablayıblar ki, hər 70 nəfərin bir il ərzində tirzepatid qəbul etməsi bir ciddi ürək-damar hadisəsinin qarşısının alınması ilə əlaqələndirilə bilər.

Alimlər preparatın bu təsirinin qan şəkərinin və bədən çəkisinin azalması ilə yanaşı, arterial təzyiq, lipidlər və iltihab kimi ürək-damar risk faktorlarına mümkün müsbət təsirləri ilə bağlı ola biləcəyini düşünürlər.

Bununla belə, tədqiqat müşahidə xarakterli məlumatlara əsaslandığından nəticələri qəti səbəb-nəticə əlaqəsi kimi qiymətləndirmək olmaz. Tirzepatidin uzunmüddətli ürək-damar təsirlərinin və müxtəlif pasiyent qruplarında effektivliyinin müəyyənləşdirilməsi üçün əlavə araşdırmalara ehtiyac var.