Avstraliyanın Kvinslend Universitetinin alimləri müəyyən ediblər ki, erkən yaşlardan müntəzəm idmanla məşğul olan uşaqlar uzunmüddətli perspektivdə daha yaxşı psixi sağlamlığa malik olurlar.

Aztibb.az xəbər verir ki, araşdırmada 4200-dən çox avstraliyalı uşağın 8 il ərzində toplanmış məlumatları təhlil edilib. Nəticələrə görə, futbol, karate, tennis və gimnastika kimi həm komanda, həm də fərdi idman növləri uşaqların psixi sağlamlığına müsbət təsir göstərir.

Komanda idmanları ilə məşğul olan uşaqlarda faydanın daha yüksək olduğu müəyyən edilib. Alimlər bunu sosial münasibətlər, həmyaşıd dəstəyi, dostluq imkanları və ümumi məqsədə birlikdə nail olmaqla əlaqələndirirlər.

Tədqiqat həm oğlanlar, həm də qızlar üçün müsbət nəticələr göstərib. Bununla belə, komanda idmanlarının faydası oğlanlarda daha nəzərəçarpan olub. Alimlər qızların komanda idmanlarına daha az cəlb olunmasının səbəbləri arasında özünəinamın aşağı olması, stereotiplər və idman imkanlarının məhdudluğunu göstərirlər.

Tədqiqat müəllifləri nəticələrin uşaqların idmana cəlb olunmasını təşviq edən strategiyaların hazırlanmasına töhfə verəcəyini bildirirlər.