Yunanıstanda Qərbi Nil virusuna yoluxma hallarının sürətlə artdığı bildirilir. Mövcud tendensiyanın davam edəcəyi təqdirdə 2026-cı ilin son illərin ən ağır dövrlərindən birinə çevrilə biləcəyi barədə xəbərdarlıq edilib.
Aztibb.az "Posta" saytına istinadən yazır ki, Yunanıstan Milli İctimai Səhiyyə Təşkilatının (EODY) məlumatına görə, avqustun 12-dək ölkədə 110 Qərbi Nil virusu infeksiyası qeydə alınıb. Xəstələrin 81-də mərkəzi sinir sistemi ilə bağlı əlamətlər müşahidə olunub, 29 nəfər isə xəstəliyi yüngül simptomlarla keçirib.
Yoluxma halları Attika, Fessaliya, Mərkəzi Makedoniya və Peloponnes bölgələrində yerləşən 39 bələdiyyədə müəyyən edilib.
Mülayim keçən qış yoluxmaların artmasına təsir edib
EODY-nin Epidemioloji Nəzarət və Yoluxucu Xəstəliklərin Qarşısının Alınması İdarəsinin rəsmisi Danai Pervanidu bildirib ki, xüsusilə Attikada virus bu il daha geniş yayılıb və yoluxma sayı əvvəlki illərin eyni dövründə qeydə alınan göstəriciləri ötüb.
Onun sözlərinə görə, temperatur və yağıntılarla yanaşı, ağcaqanadların sayının artması və quşların miqrasiya marşrutları da virusun yayılmasına təsir edən amillərdəndir. 2025-2026-cı illərin qışının Attikada son 150 ilin ikinci ən isti qışı olması da mövcud vəziyyətə təsir göstərmiş ola bilər.
2026-cı il son illərin ən ağır dövrlərindən biri ola bilər
Pervanidu virusun əvvəlki illərlə müqayisədə daha yoluxucu olması və ya davranışının dəyişməsi ilə bağlı elmi sübutların olmadığını bildirib.
Bununla belə, yoluxma hallarının artımı eyni sürətlə davam edərsə, 2026-cı ilin qeydə alınacaq xəstəlik sayı baxımından son illərin ən ağır dövrlərindən biri ola biləcəyi barədə xəbərdarlıq edib.
Vətəndaşlara xəbərdarlıq
EODY vətəndaşlara ağcaqanad əleyhinə vasitələrdən istifadə etməyi, evlərdə tor və ağcaqanad örtüklərindən yararlanmağı, xüsusilə axşam saatlarında bədəni örtən geyimlərə üstünlük verməyi tövsiyə edib.
Həmçinin ağcaqanadların çoxaldığı durğun su mənbələrinin aradan qaldırılması çağırışı edilib.
Avropa Xəstəliklərin Qarşısının Alınması və Nəzarəti Mərkəzinin məlumatlarına görə, Yunanıstan Avropada Qərbi Nil virusuna yoluxma hallarının sayına görə İtaliyadan sonra ikinci yerdədir.
