Ümumi cərrah-transplantoloq Tariyel Nadirov uğurla icra olunan növbəti böyrək nəqli əməliyyatı barədə məlumat paylaşıb.

Aztibb.az xəbər verir ki, həkimin bildirdiyinə görə, təxminən iki ay əvvəl ikitərəfli nefrektomiya əməliyyatı keçirərək hər iki böyrəyi xaric edilən xəstə həmin vaxtdan etibarən dializ müalicəsi almağa başlayıb. Əməliyyatdan dərhal sonra pasiyentin yenidən sağlamlığına qovuşması üçün orqan köçürülməsi hazırlıqlarına start verilib. Bu prosesdə qardaşı öz böyrəyini bağışlayaraq bacısının dializ asılılığından qurtulmasına səbəb olub.

Üç gün əvvəl həyata keçirilən uğurlu transplantasiya nəticəsində pasiyent dializsiz həyata qədəm qoyub. Vəziyyəti tam qənaətbəxş olan donor bu gün artıq evə buraxılıb. Əməliyyatdan iki gün sonra aparılan laborator müayinələrdə xəstənin qanda kreatinin göstəricisi normallaşaraq 0,6 mq/dL təşkil edib və onun da ən qısa vaxtda evə yazılması planlaşdırılır.