İnsanın pasport yaşı hər zaman onun sağlamlıq vəziyyətini əks etdirmir. Belə ki, bəziləri 50 yaşında yüksək fiziki aktivliyini qoruyub saxladığı halda, digərləri artıq 35 yaşında xroniki xəstəliklərlə üzləşə bilər.

Aztibb.az "Life" portalına istinadən yazır ki, bu barədə mama-ginekoloq və ultrasəs diaqnostikası üzrə həkim Viktoriya Kulaqina məlumat verib.

Həkimin sözlərinə görə, bioloji yaş orqanizmə aid orqanların, toxumaların və hüceyrələrin eyni xronoloji yaşda olan digər insanlarla müqayisədə nə dərəcədə səmərəli fəaliyyət göstərdiyini göstərən göstəricidir.

Bioloji yaşın formalaşmasına bir sıra amillər təsir edir. Bunlara:

genetik xüsusiyyətlər;
qidalanma vərdişləri;
fiziki aktivlik;
yuxunun keyfiyyəti;
stress səviyyəsi;
xroniki xəstəliklərin mövcudluğu;
həyat tərzi ilə bağlı digər amillər daxildir.

Mütəxəssis vurğulayıb ki, eyni ildə doğulan iki insanın orqanizmi illər sonra tamamilə fərqli vəziyyətdə ola bilər. Birində maddələr mübadiləsi normal işləyir və fiziki forma qorunur, digərində isə vaxtından əvvəl qocalma əlamətləri müşahidə edilir.

V.Kulaqina qeyd edib ki, genetika mühüm rol oynasa da, bioloji yaşa təsir edən amillərin böyük hissəsi gündəlik həyat tərzi ilə bağlıdır. Bu səbəbdən müasir tibb xəstəliklərin profilaktikasına, sağlam həyat tərzinin təşviqinə və qocalma proseslərini, eləcə də sağlam ömür müddətinin uzadılması yollarını araşdıran gerontologiya elminin inkişafına xüsusi önəm verir.