Naxçıvan Muxtar Respublikası Səhiyyə Nazirliyinin təşkilatçılığı ilə “Naxçıvan Muxtar Respublika Xəstəxanası” PHŞ-nin ixtisaslı həkim briqadası tərəfindən Ordubad rayonunun “Dırnıs Kənd ASM”də əhali üçün tibbi müayinə aksiyası keçirilib.
Naxçıvan MR Səhiyyə Nazirliyindən Aztibb.az-a verilən məlumata görə, aksiya çərçivəsində ümumilikdə 75 nəfər ixtisaslı həkimlər tərəfindən tibbi müayinədən keçirilib.
Müayinələr zamanı 11 nəfər kardioloq, 12 nəfər oftalmoloq, 14 nəfər nevropatoloq, 12 nəfər terapevt, 5 nəfər üz-çənə cərrahı və 4 nəfər endokrinoloq tərəfindən müayinə olunub. Həmçinin 17 nəfərə ultrasəs müayinəsi (USM) aparılıb.
Aksiya əhalinin tibbi xidmətlərə əlçatanlığının artırılması, xəstəliklərin erkən aşkarlanması və profilaktik tədbirlərin gücləndirilməsi məqsədilə həyata keçirilib.
Qeyd edək ki, səhiyyənin inkişafı istiqamətdə həyata keçirilən tədbirlər çərçivəsində Naxçıvan Muxtar Respublikası Səhiyyə Nazirliyi tərəfindən regionun müxtəlif yaşayış məntəqələrində əhalinin sağlamlığının qorunmasına, tibbi xidmətlərin əlçatanlığının təmin edilməsinə və vətəndaşlara yerində ixtisaslı tibbi xidmət göstərilməsinə xüsusi diqqət yetirilir.
