Samux rayonunda bir nəfərdə laborator müayinələrlə qarayara xəstəliyi təsdiqlənib və aparılan ilkin epidemioloji araşdırmalar zamanı həmin şəxsin iribuynuzlu heyvanla təmasda olduğu müəyyən edilib. Hadisə ilə əlaqədar təmasda olan bütün şəxslər dərhal müəyyənləşdirilərək tibbi müşahidəyə götürülüb və ərazidə zəruri laborator müayinələrlə yanaşı geniş epidemioloji tədbirlər icra olunub.

Aztibb.az "APA"ya istinadən yazır ki, Səhiyyə Nazirliyinin Respublika Gigiyena və Epidemiologiya Mərkəzinin şöbə müdiri Aytəkin Qurbanovanın sözlərinə görə, qarayara insandan-insana asanlıqla keçməyən zoonoz infeksiya olduğu üçün hazırda əhali arasında xəstəliyin yayılması müşahidə edilmir və vəziyyət aidiyyəti qurumların tam nəzarətindədir. Mütəxəssis vurğulayıb ki, bakteriya orqanizmə əsasən xəstə heyvanlarla təmas, dəridəki kəsiklər və yaxşı bişirilməmiş ət vasitəsilə daxil olsa da, vaxtında müəyyən edildikdə stasionar şəraitdə antibiotik terapiyası ilə tam müalicə olunur.

Nəzarət tədbirlərinin davam etdirildiyini bildirən nazirlik rəsmisi əhalini təsdiqlənməmiş şayiələrə inanmamağa, yalnız rəsmi məlumatlara istinad etməyə və baytarlıq nəzarətindən keçməmiş ət məhsullarından uzaq durmağa çağırıb.