Sağlam diş və diş ətləri yalnız müntəzəm stomatoloq müayinəsindən deyil, evdə düzgün ağız boşluğu gigiyenasından da asılıdır. Dişləri gündə iki dəfə fırçalamaq vacib olsa da, yanlış texnika və digər səhvlər kariyes, diş əti xəstəlikləri və diş həssaslığı riskini artıra bilər.
Aztibb.az xəbər verir ki, ağız boşluğuna gündəlik qulluq zamanı ən çox yol verilən səhvlər arasında dişlərin yanlış texnika ilə fırçalanması, kifayət qədər vaxt ayrılmaması, uyğun olmayan diş fırçası və pastanın seçilməsi, fırçanın gec dəyişdirilməsi və stomatoloq müayinələrinin təxirə salınması yer alır.
Dişləri çox güclü təzyiqlə və yalnız sağa-sola hərəkətlərlə fırçalamaq diş ətini zədələyə, diş minasının aşınmasına səbəb ola bilər. Fırçanı diş əti xəttinə təxminən 45 dərəcə bucaq altında yerləşdirmək və yüngül hərəkətlərlə təmizləmək daha məqsədəuyğundur. Dişlərarası sahələrin təmizliyi də unudulmamalıdır. Bunun üçün diş sapı və dişlərarası fırçalardan istifadə edilə bilər.
Dişlərin təmizlənməsinə kifayət qədər vaxt ayırmaq da vacibdir. Mənbədə effektiv təmizləmə üçün 2-3 dəqiqənin kifayət etdiyi, breket və ya protezlərdən istifadə edənlərdə isə daha uzun müddət tələb oluna biləcəyi bildirilir.
Diş pastası və fırça seçimi də fərdi ehtiyaclara uyğun aparılmalıdır. Həssas dişlər üçün uyğun olmayan ağardıcı pastalar və həddindən artıq sərt fırçalar diş minasına və diş ətinə zərər verə bilər. Fırçanın sərtliyinin və formasının stomatoloqla məsləhətləşərək seçilməsi tövsiyə olunur.
Diş fırçası da vaxtında dəyişdirilməlidir. Fırçanın təxminən 2-3 aydan bir, tükləri deformasiyaya uğradıqda isə daha tez dəyişdirilməsi məsləhətdir. İnfeksion və ya ağız boşluğu xəstəliklərindən sonra da yeni fırçadan istifadə etmək məqsədəuyğundur.
Stomatoloq müayinəsini yalnız ağrı yarandıqda xatırlamaq da düzgün deyil. Bəzi ağız boşluğu xəstəlikləri ilkin mərhələdə heç bir əlamət verməyə bilər. Buna görə profilaktik müayinələrin mütəmadi aparılması problemlərin erkən aşkarlanmasına və daha sadə müalicə olunmasına imkan verir.
Diş və diş ətlərində ağrı, fırçalama zamanı qanama, ağız qoxusu, dişlərin boşalması, mina və ya diş ətinin rəngində dəyişiklik, diş travması və çeynəmə zamanı narahatlıq yarandıqda stomatoloqa müraciət etmək lazımdır.
Düzgün ağız gigiyenasına əməl edilmədikdə diş ərpi və daşı, kariyes, diş əti iltihabı, ağız qoxusu və diş həssaslığı kimi problemlər yarana bilər. Gündəlik düzgün qulluq və müntəzəm stomatoloji nəzarət ağız sağlamlığının uzun müddət qorunmasına kömək edir.
