Beyləqan Rayon Mərkəzi Xəstəxanasının tabeliyində fəaliyyət göstərən kənd həkim məntəqələri və kənd tibb məntəqələrinin əməkdaşları tərəfindən həssas əhali qruplarına daxil olan vətəndaşların sağlamlıq vəziyyətinin qiymətləndirilməsi məqsədilə ev ziyarətləri təşkil olunub.

Aztibb.az xəbər verir ki, ziyarətlər zamanı vətəndaşların ümumi sağlamlıq vəziyyəti qiymətləndirilib, tibbi müayinələr aparılıb və sağlamlıqlarının qorunması ilə bağlı müvafiq tövsiyələr verilib. Tibbi göstəriş və ehtiyac yarandığı hallarda vətəndaşların sonrakı müalicə və tibbi xidmətlərdən yararlanması üçün aidiyyəti üzrə istiqamətləndirilməsi də həyata keçirilib.

Evdə tibbi xidmətlərin təşkili xüsusilə tibbi müəssisələrə müraciət etmək imkanları məhdud olan şəxslər üçün mühüm əhəmiyyət daşıyır. Bu yanaşma əhalinin sağlamlıq vəziyyətinin daha yaxından izlənilməsinə, xəstəliklərin vaxtında aşkarlanmasına və zəruri tibbi xidmətlərə çıxışın təmin olunmasına imkan yaradır.

Beyləqan Rayon Mərkəzi Xəstəxanası tərəfindən həyata keçirilən bu cür tibbi xidmətlər əhalinin sağlamlığının qorunmasına və tibbi xidmətlərin əlçatanlığının artırılmasına yönəlib.