Tədris Cərrahiyyə Klinikasında mama-ginekoloq Əzəmət Qurbanova tərəfindən 45 yaşlı xəstəyə laparoskopik histerektomiya əməliyyatı icra olunub.

Klinikadan Aztibb.az-a bildirilib ki, xəstədə anormal uşaqlıq qanaxması müşahidə olunub. Aparılan müayinələr zamanı uşaqlıq boynunda HPV ilə əlaqəli yüksək dərəcəli zədələnmə aşkarlanıb. Müvafiq klinik göstərişlər əsasında xəstəyə uşaqlığın laparoskopik üsulla götürülməsi əməliyyatı həyata keçirilib.

Əməliyyat zamanı minimal invaziv qapalı cərrahi yanaşmadan istifadə olunub. Xəstənin yaşı, klinik vəziyyəti və yumurtalıqlarda hər hansı problem aşkarlanmadığı nəzərə alınaraq yumurtalıqların qorunması mümkün olub.

Laparoskopik histerektomiyanın əsas üstünlükləri arasında daha az toxuma travması, əməliyyatdan sonra daha az ağrı, qarın boşluğunda bitişmə və yapışmaların daha az olması, həmçinin xəstənin daha sürətli reabilitasiya və sağalma dövrü keçirməsi qeyd olunur.

Əməliyyat uğurla başa çatdırılıb. Xəstənin vəziyyəti hazırda stabildir və tibbi nəzarət altında saxlanılır.