Avqustun yüksək temperaturu təkcə narahatlıq yaratmır, damar sağlamlığına da mənfi təsir göstərə bilər. Həddindən artıq tərləmə nəticəsində maye itkisi, uzun müddət hərəkətsiz qalmaq və isti havanın qan dövranına təsiri xüsusilə risk qrupunda olan insanlarda qan laxtası yaranması ehtimalını artıra bilər.
Aztibb.az xəbər verir ki, damar daxilində yaranan qan laxtası damarı qismən və ya tamamilə tıxaya bilər. Ən çox ayaqların dərin venalarında yaranan laxta qoparaq ağciyərlərə çatdıqda ağciyər emboliyasına səbəb ola bilər. Laxtalanma beyin və ürək damarlarında da insult və infarkt kimi ağır nəticələrə gətirib çıxara bilər.
İsti havalarda çox tərləmək və kifayət qədər maye qəbul etməmək qanın qatılaşmasına, damarların genişlənməsi isə xüsusilə ayaqlarda qan dövranının yavaşlamasına səbəb ola bilər. Uzun müddət hərəkətsiz qalmaq da bu riski artırır.
Dörd saatdan uzun davam edən təyyarə, avtobus və avtomobil səfərlərində risk daha yüksəkdir. Belə hallarda hər 1-2 saatdan bir ayağa qalxıb hərəkət etmək, ayaq biləyi hərəkətləri etmək, kifayət qədər su içmək və rahat geyimlərə üstünlük vermək tövsiyə olunur.
Əvvəllər qan laxtası keçirmiş şəxslər, 60 yaşdan yuxarı insanlar, xərçəng xəstələri, böyük əməliyyat keçirənlər, uzun müddət yataq rejimində olanlar, hamilə və zahılıq dövründəki qadınlar, piylənməsi olanlar, siqaret çəkənlər, şəkərli diabet və ürək çatışmazlığı olanlar daha yüksək risk qrupundadır.
Qan laxtasının qarşısının alınması üçün susamağı gözləmədən su içmək, müntəzəm hərəkət etmək, uzun müddət eyni vəziyyətdə qalmamaq, sağlam çəkini qorumaq və siqaretdən uzaq durmaq vacibdir. Risk qrupunda olan şəxslərə həkim məsləhəti ilə qan durulaşdırıcı dərmanlar və ya kompressiya corabları təyin edilə bilər.
Bir ayaqda qəfil şişkinlik, ağrı, istilik və qızartı dərin vena trombozunun əlaməti ola bilər. Qəfil nəfəs darlığı, sinə ağrısı, ürəkdöyünmə və qanlı öskürək isə laxtanın ağciyərə getməsinə işarə edə bilər. Bu əlamətlər zamanı vaxt itirmədən təcili tibbi yardım almaq lazımdır.
Yay aylarında kifayət qədər su içmək, aktiv qalmaq və risk əlamətlərinə diqqət yetirmək qan laxtası ilə bağlı ciddi fəsadların qarşısının alınmasına kömək edə bilər.
