Yeni Klinikanın Tibbi Tədris – Simulyasiya Mərkəzində Bakı Baş Səhiyyə Mərkəzinin strukturuna daxil olan tibb müəssisələrinin sterilizasiya otaqlarına cavabdeh tibb bacıları üçün “Təhlükəsiz sterilizasiya: nəzəriyyədən praktikaya – Modul 1” mövzusunda təlim keçirilib.

Bu barədə Aztibb.az-a Yeni Klinikadan məlumat verilib.

Bildirilib ki, üç hissədən ibarət olan təlim Yeni Klinikanın Sterilizasiya bölməsinin müdiri Nazim Orucəliyev tərəfindən keçirillib.

Təlimin birinci hissəsində mərkəzi sterilizasiya şöbəsinin quruluşu və iş prinsipləri, sterilizasiya prosesinin əsas mərhələləri, prosesə nəzarət və sənədləşmə qaydaları barədə məlumat verilib.

İkinci hissədə sterilizasiya prosesində qarşıya çıxa biləcək bioloji, kimyəvi və fiziki risklər, iynə və iti alətlərlə zədələnmələrin qarşısının alınması, fövqəladə hallarda görüləcək tədbirlər, həmçinin fərdi qoruyucu vasitələrin düzgün seçilməsi və istifadəsi məsələləri diqqətə çatdırılıb.

Təlimin praktiki hissəsində iştirakçılar şöbədə tibbi alətlərin qəbul edilməsi, ön təmizlik, dezinfeksiya, durulama, qurutma və vizual yoxlama, qablaşdırma, kimyəvi indikatorların yerləşdirilməsi, sterilizatorun yüklənməsi, sterilizasiya dövrünün izlənməsi, steril materialların boşaldılması və saxlanması, eləcə də sənədləşmənin aparılması üzrə praktiki məşğələlərdə iştirak ediblər.

Qeyd edək ki, Tibbi Tədris – Simulyasiya Mərkəzinin əsas məqsədi müasir tibbi təcrübəyə əsaslanan praktiki təlimlər vasitəsilə tibb işçilərinin peşəkar bacarıqlarını inkişaf etdirmək, təhlükəsiz və keyfiyyətli tibbi xidmət standartlarının tətbiqini təmin etməkdir.